Навивач тргнал пеш на СП во Катар, по пат позирал со пушка во Иран, веднаш го уапсиле (ФОТО)

Неодамна Шпанија беше шокирана од веста дека исчезнал Сантијаго Санчез, навивач кој пешачел на Мундијалот до Катар, а сега пристигнаа нови информации.

Санчез имаше намера да ја бодри „црвената фурија“ на Мундијалот, а од Мадрид пеш тргна на Блискиот Исток.

Редовно контактираше со семејството и пријателите, а впечатоците од патувањето ги споделуваше со своите следбеници на социјалната мрежа Инстаграм, до 2 октомври.

На тој ден престанала секоја комуникација со него, пренесува шпанска „Марка“.

Угледниот весник наведува и дека неколку дена по неговото исчезнување било објавено дека Санчез е во затвор во Иран, само десет дена откако се сликал со војници во Ирак кои дури му дозволиле да позира држејќи пушка.

Последната позната локација е Пенвин, област во Ирак, на само пет километри од границата со Иран во близина на планините каде што планирал да преноќи, а наводно бил уапсен на околу 110 километри одалеченост од Сакез, по што е префрлен во затвор во Техеран.

Последен пат кога стапи во контакт со семејството рече дека „малку е жешко, но се е во ред“, мислејќи на политичките конфликти што се случуваат во таа земја.