Дијаз и Милан – Невозможна мисија!

Синоќа Брахим Дијаз беше херојот на Милан. Шпанецот го постигна единствениот гол во првиот осминафинален натпревар од Лигата на шампионите против Тотенхем и им донесе предност на Росонерите пред реваншот во Лондон.

Денеска пропаднаа надежите на навивачите на актуелниот шампион на Италија дека Дијаз би можел да стане нивен играч на крајот од сезоната.

Како што пренесуваат медиумите во Шпанија и Италија, 23-годишниот Дијаз, кој од летото 2020 година е на позајмица во Милан од Реал Мадрид, по крајот на сезоната сигурно ќе се врати во „кралскиот“ клуб.

Се споменуваше дека постои клаузула според која офанзивниот играч за врска Милан би можел да го купи за 22.000.000 евра, но таа опција не постои.

За судбината на Дијаз се прашува само Реал Мадрид, а актуелниот европски шампион реши да го задржи Шпанецот и да му даде шанса да се наметне следната сезона.