Фудбал
Хејкенс ќе биде новиот тренер на Баерн
Германскиот шампион Баерн Минхен ќе го активира веќе четири години пензионираниот Јуп Хејкенс кој ќе го предводи тимот до крајот на сезоната, објавија германските медиуми.
Сензационалната вест доаѓа по многуте шпекулации кој ќе биде наследникот на Карло Анчелоти на тренерското место кое остана празно по отпуштањето на Италијанецот. Се спомнуваа Томас Тухел, Луис Енрике, Луиј Ван Гал, но по се изгледа на клупата на Баварците ќе седне 72-годишниот Хејкенс.
Тој последен пат беше тренер во 2013 година кога со Баерн ја освои Лигата на шампионите.
Хејкенс покрај трофејот во ЛШ има три титули во Бундеслигата, еден Суперкуп, а еднаш Лигата на шампиони ја освои и со Реал Мадрид.
Се очекува неговата промоција на клупата на Баерн да биде по паузата за репрезентативните настапи.