Њукасл го отпушти Лорис Кариус

Моментално третопласираниот премиерлигаш Њукасл го раскина договорот со 29-годишниот германски голман Лорис Кариус, само три месеци откако поранешниот голман на Ливерпул му се приклучи на најбогатиот клуб во светот на слободен трансфер по епизодата во Бундеслигата.

Кариус не настапи на ниту еден официјален натпревар за Њукасл и не може да се каже дека придонел за добрите настапи на тимот под водство на Еди Хау. Ник Поуп има загарантирана единица и има доволно резервни опции на клупата што го направија Кариус вишок. Некогаш важеше за талентиран голман, кого Јирген Клоп пред седум години го донесе од Мајнц на „Енфилд“ за шест милиони фунти.

Иако Кариус забележа 49 настапи за Ливерпул во текот на две сезони, тој е најпознат по двете грешки што ги направи за време на финалето на Лигата на шампионите во 2018 година против Реал Мадрид, придонесувајќи за поразот од 3-1. Последните три години ги помина на позајмица во Бешикташ и Унион Берлин.