Падна тренерски шеф во Бундеслигата

Аугсбург се раздели со тренерот Енрико Маасен, објави клубот. Причина за разделбата е лошата форма во која се наоѓа баварскиот клуб од почетокот на сезоната во Бундеслигата. Аугсбург е на 15. место со само 5 бода од 7 натпревари и е во серија од 2 порази.

„По опсежни дискусии и проценка на моменталната спортска ситуација, ФК Аугсбург одлучи веднаш да се раздели со главниот тренер Енрико Маасен. Ви благодариме многу за вашата неуморна работа за нашиот фудбалски клуб, Енрико!“, напиша Аугсбург на клупскиот профил на Твитер.

Nach ausführlichen Gesprächen und der Bewertung der aktuellen sportlichen Situation ist der FC Augsburg zu der Entscheidung gekommen, sich mit sofortiger Wirkung von Cheftrainer Enrico #Maaßen zu trennen. Vielen Dank für Deinen unermüdlichen Einsatz für unseren #FCA, Enno!

— FC Augsburg (@FCAugsburg) October 9, 2023

И самиот Маасен ја коментираше разделбата, не криејќи го разочарувањето: „Нормално, разочаран сум од оваа одлука, бидејќи сум убеден дека заедно можеме да ја промениме ситуацијата. Благодарен сум на Аугсбург и на управата на клубот што ми дадоа можност да работам во Бундеслигата. На клубот му посакувам се најдобро во иднина и се надевам дека темелите што ги поставивме заедно можат да доведат до успех“.

Тобијас Штробл, кој е тренер на тимот до 23 години, ќе го води машкиот тим додека Аугсбург не најде постојана замена за Маасен.