Почина познат македонски фудбалер

Со омилената фамилијарна слика на сега покојниот Јордан Ражанков ја објавуваме жалната вест за неговото починување во 81 година од животот во Лос Анџелес, во Соединети Американски Држави. Ретко кој од повозрасните фудбалски потковани штипјани не знае за Јордан Ражанков кој во дресот на Брегалница ги доживеа звездените моменти на својата фудбалска кариера. Почетоците во пеесетите години на минатиот век му беа со другарите како што милуваше да ги нарекува „егејци“ кои го натераа на фудбалската игра. Најпрвин во сувото корито на реката Отиња со „парталава“ топка а подоцна на градскиот терен покрај Брегалница. Тренери му беа повозрасните играчи, за да подоцна дојдат вистинските„учители“ на фудбалската игра. Ги мина сите пионерско – младински категории се до сениорскиот статус во Брегалница.

Со златни букви е запишана годината 1964 кога Брегалница како македонски шампион по квалификацискиот меч со Титоград влезе во тогашната Втора Југословенска лига. Тој успех го постигнаа играчите: Ефремов,Иванов, Манушев, Хаџиев, Ципушев,Наџаков,Желев, Ашиков, Ражанков,Гордош и Спасовски како уште и Миладинов, Чупев, Каракашев, Јакимов,Арсов,Крстев, Босниќ….

Дел од публиката, – искрено раскажуваше Ражанков, не го сакаше, но затоа пак беше исклучително омилен кај тренерите, знаеше кога да ја „нагазни“ топката, како да направи тактични прекршок при опасни контра напади и како да го извади од такт противникот.

По завршувањето на кариерата беше фудбалски судија, успешен тренер во екипите на Рудар, Силекс, Плачковица , беше „технико“ но како што велеше на шала – никогаш не беше Директор на клуб.

Покрај фудбалот Јордан Ражанков беше професор по Македонски јазик и литература, работеше искрено и со задоволство во воспитно – образовни институции со што остави длабоки траги за сите искрени љубители и на фудбалот и на општествениот живот како во Штип така и во цела Македонија. Во името на целокупната редакција на Мнет ТВ искрено сочувство кон семејството на Јордан Ражанков и нека му е вечна слава.

Драги Герасимов – Пушка Mnet.mk