Реал Мадрид со пенали над Валенсија до финалето на шпанскиот Суперкуп!

Фудбалерите на Реал Мадрид се првите финалисти на Суперкупот на Шпанија откако по изведувањето пенали ја совладаа Валенсија.

Реал поведе со голот на Бензема, а Лино израмни, и резултатот остана 1:1 до 90. а потоа и до 120. минута.

Во пенал рулетот за Валенсија непрецизни беа Комер и Гаја, додека во Реал Мадрид сите беа прецизни за ново финале.

Карло Анчелоти имаше одредени кадровски проблеми, откако во Ријад не пристигнаа Орељан и Алаба, а на клупата останаа уморниот Модриќ и уморниот Дани Карвахал, па стартери беа Лукас Васкез, Начо, Камавинга.

Реал и вечерва не беше на своето ниво, практично, пеналот од кој погоди Бензема беше единствениот удар кон голот на Валенсија.

Тимот на Џенар Гатузо не се двоумеше да нападне, а во првото полувреме најдобрата шанса ја имаше Кавани, чиј удар со глава го запре Куртоа.

Реал ја казни првата послаба реакција на одбраната на Валенсија, Бензема му побегна на Комер, кој го собори во шеснаесетникот за чист пенал. Бензема ја презеде одговорноста и стрелаше прецизно од 11 метри за 1:0 , што беше и резултат на првото полувреме.

Валенсија одлично го започна вториот дел, во првиот напад, во 46. минута Лато одлично нафрли на втората статива, а Лино му побегна на Васкез и со волеј удар го совлада Курто за 1:1.

Следуваше период во кој Валенсија беше поконкретна и поконкретна на половината на Реал, но немаше реални шанси.

Повредите продолжија да го осакатуваат Реал Мадрид, бидејќи теренот прво мораше да го напушти Васкез, на негово место дојде Карвахал, а потоа Едер Милитао поради вртоглавица мораше да го напушти теренот, а влезе Ферлан Менди.

Во последните моменти од регуларниот дел од натпреварот најдобрата шанса ја имаше Винисиус. Топката се одби од дефанзивец на Валенсија, Бразилецот остана сам пред голот, но Мамардашвили одлично интервенираше, па отиде во продолжение.

Истите играчи беа во центарот на вниманието на стартот на првото продолжение, Винисиус Жуниор имаше одличен удар од 20-ина метри, но голманот на Валенсија повторно одлично одбрани.

Повторно изостанаа вистински шанси, а потоа на крајот од првото продолжение Мамардашвили мајсторски го одбрани топовскиот удар на Крос од далечина.

Валенсија чекаше шанса од контранапад и во 110. минута беше најблиску до победа. Илаис Мориба го проигра Перез, а овој одлично шутираше, но Куртоа со најдобрата одбрана на натпреварот го спаси голот на Реал.

И по дополнителни 30 минути немаше промена во резултатот, па пеналите го решија победникот.

Серии од пенали:

1. Кавани рутински во десниот агол, Бензема моќно на левата страна – 1:1
2. Комер шутира над голот, Модриќ сигурен – 1:2
3. Мориба ладнокрвно во средината, Крос исто така смирен – 2:3
4. Гилијамон под гредата, Асенсио покрај стативата – 3:4
5. Ударот на Гаја во средината го одбрани Курто, Реал оди во финале!

Во вториот полуфинален натпревар во четврток од 20:00 часот се среќаваат Бетис и Барселона.