Шарапова разочарана поради повлекувањето на Серена од „Ролан Гарос“

Русинката Марија Шарапова изјави дека со нетрпение го очекувала натпреварот против Серена Вилијамс на „Ролан Гарос“ и поради тоа е разочарана од откажувањето на нејзината ривалка.

Серена, сепак, се откажа пред дуелот меѓу двете во четвртиот круг од „Грен слем“ турнирот во Париз.

Шарапова се квалификуваше без борба за четвртфиналето.

– Со нетрпение го очекував натпреварот. Разочарана сум дека се повлече. Посакувам брзо заздравување и се надевам дека наскоро ќе се врати, рече кратко Марија Шарапова.

Претходно, Вилијамс на вонредна прес-конференција изјави дека поради големи болки во грбот и рамото мора предвреме да го предаде мечот со Русинката.

– Имам проблеми со мускулот во грбот и за жал состојбата само се влошува. Во овој момент не можам да сервирам и навистина е тешко за мене да играм кога не можам да сервирам. Никогаш не сум почувствувала вакво нешто, многу е болно, објасни некогашната број 1 во светскиот тенис.