Уште девет слободни места за Светското првенство во Русија 2018

Вкупно 23 репрезентации досега имаат изборено пласман на Светското првенство што следната година од 14 јуни до 15 јули ќе се одржи во Русија. За другите девет слободни места ќе бидат одиграни четири бараж дуели во европската зона, како и два интерконтинентални баражи и последното коло по групи од африканската зона.

Осум европски селекции ќе одиграат бараж дуели, а тоа го изборија второпласираните селекции во групите со исклучок на Словачка. Двојките за баражите ќе бидат извлечени на 17 октомври во Цирих, а ден претходно ФИФА ќе ги подели осумте репрезентации во два стаклени сада. Пласман во баражот обезбедија: Хрватска, Данска, Грција, Италија, Северна Ирска, Република Ирска, Шведска и Швајцарија.

Во двата интерконтинентални бараж дуели ќе играат: Нов Зеланд (победник на зоната Океанија) против Перу (петтопласирана селекција од Јужна Америка) и Хондурас (четвртопласирана селекција од КОНКАКАФ зона) и Австралија (победник на азискиот бараж).

Трите преостанати места ќе се пополнат со трите првопласирани селекции од групите од африканската зона.

Бараж натпреварите ќе се играат во периодот од 6 до 14 ноември.

Пласман на Мундијалот имаат обезбедено: Русија (домаќин), Бразил, Уругвај, Аргентина, Колумбија (Јужна Америка), Иран, Јапонија, Јужна Кореја, Саудиска Арабија (Азија), Мексико, Костарика, Панама (КОНКАКАФ), Белгија, Германија, Англија, Шпанија, Франција, Полска, Исланд, Србија, Португалија (Европа), Нигерија и Египет (Африка).