Астон Мартин го претстави болидот за 2022 година

Астон Мартин го претстави болидот „AMR22“ на церемонија одржана во седиштето на компанијата во Хејдон (Велика Британија).

Новиот модел има променет аеродинамичен дизајн во однос на минатата година и би требало да биде значително поконкурентен во шампионатот во Формула 1. Новина е поголемото присуство на нејасна жолта боја на зеленото возило.

Четирикратниот светски шампион Себастијан Фетел и Ленс Строл ќе возат за тимот на Астон Мартин, исто како и минатата сезона, во која го освоија седмото место во конкуренција на конструктори.

„Продолжуваме да се искачуваме на врвот на Формула 1. За да го освоиме шампионатот, сè мора да биде на вистинското место. Ни требаат вистинските луѓе на сите позиции. Мислам дека сме на вистинскиот пат“, рече Лоренс Строл, извршен директор на Aston Martin.

За нешто помалку од две недели сите тимови ќе почнат со тестирање во Барселона, а подоцна ќе се преселат во Бахреин. Стартот на шампионатот е закажан за 20 март во Бахреин.