Честитки за Модриќ, но има подобри фудбалери од него

Диего Симеоне беше главен во кампањата според која напаѓачот на неговиот тим, Атлетико (М), Антоан Гризман, треба да ја добие “Златната топка” на Франс фудбал. За жал, сите обиди на аргентинскиот стручњак завршија без успех затоа што најважната индивидуална награда во фудбалскиот свет заврши кај хрватскиот интернационалец Лука Модриќ.

• Многу е потешко да се дојде до некоја награда кога го носиш дресот на Атлетико (М). Тоа е така затоа што ние мораме дупло повеќе да работиме затоа што само така ќе им се доближиме на поважните клубови. Кога е во прашање Гризман, јас би бил среќен. Го освои Светското првенство, а тоа е многу тешко. Секој има право на избор, секој може да одлучи што е исправно. Честитки до Модриќ кој имаше голема сезона, но за мене најдобри се Варан и Гризман, изјави Симеоне.

Предводникот на “јорганџиите” даде интересен одговор и на прашањето дали неговите фудбалери се исто ценети колку што се ценети тие на градскиот ривал Реал (М).

• Ха-ха! Ме насмеавте и сакате да го кажам тоа што сите го знаат. Куртоа потпишува за Реал (М) и веднаш е најдобар голман во светот. Кога беше дел од Атлетико (М), наградата ја доби Кејлор Навас. Има работи кои не се реални. Во овој фудбалски свет мора да знаеш каде си и што те чека. Така полесно ќе живееш, додаде Симеоне.