Фудбалската класика без победник, Италија подобра од Унгарија, Турците убедливи

Во вторникот вечерта се одиграа натпреварите од второто коло во Лигата на нации.

Во групата три од Лигата А се одиграа два натпревари. Италија ја победи Унгарија со 2:1 и со тоа се најде на чело на табелата со четири бода, бидејќи во првото коло ремизираше со Германија (1:1).

„Аѕурите“ поведоа со голот на Барел во 30. минута, за на крајот на првиот дел Пелегрини да зголеми на 2-0. Автоголот на Манчини го намали резултатот на 2:1 во 61. минута, но Унгарците не успеаја да стигнат барем до бод до крајот.

Од особен интерес беше фудбалската класика меѓу Германија и Англија во Минхен. Откако мрежите мируваа во првите 45 минути, беше постигнат по еден гол на двете страни.

Германците беа подобри и сосема заслужено поведоа во 50. минута преку Хофман, а во 88. минута по прегледот на ВАР беше досуден пенал за гостите, од кој Кејн ги постави конечните 1:1.

Германците се претпоследни со два бода, а Англичаните со само еден бод на последното место на табелата.

Што се однесува до Лигата Ц, во групата 1 се одиграа два натпревари. Турција ја совлада Литванија со 6:0 на гости, додека Луксембург со двајца играчи повеќе победи со 1:0 на гостувањето кај Фарските Острови.

Турција и Луксембург имаат по шест, додека Фарски Острови и Литванија се без бодови.