Навивачите не знаат многу за фудбалската игра

Офанзивниот бек на Рома, Александар Коларов размислува сосема различно од најверните фанови на италијанскиот калчолигаш, кои се видно загрижени поради последните резултати на “волчицата” во Серија А. Во саботата, Рома доживеа минимален пораз на гостувањето во Удине и сега е седмопласирана на првенствената табела со дури 18 бода помалку од првопласираниот Јувентус.

• Навивачите мора да сфатат дека не знаат толку многу за фудбалската игра. Јас никогаш не сум си дозволил да го коментирам Ѓоковиќ или да давам некакви совети околу тактиката. Многу се збори, се трошиме премногу, а ништо корисно не сме кажале. Сакам да гледам кошарка и тенис, но ништо не знам околу тоа, изјави Коларов.

И покрај лошите резултати на домашната сцена, српскиот интернационалец е убеден дека Рома ќе заврши во топ четири и ќе обезбеди пласман во Лигата на шампиони.

• Убеден сум дека на крајот од сезоната ќе бидеме во топ четири. Удинезе упати само еден удар кон нашиот гол и постигна погодок, додаде офанзивниот бек.