Очевидец раскажува за убиството на фудбалерот Јанушев: За малку ќе го убиеја и син ми (ВИДЕО)

Oчевидец пред телевизиските камери раскажува за убиството на фудбалерот Мартин Јанушев вечерва во скопската општина Аеродром.

Му пришле пред влезот од неговата зграда, го застрелале и веднаш побегнале оставајќи го пиштолот зад себе. 4 до 5 куршуми завршиле во главата и во вратот на 25 годишното момче. Случајни минувачи притрчале да му помогнат и веднаш со автомобил го однеле во Градската хируршка болница, но било предоцна.

Дежурниот јавен обвинител издаде повеќе насоки и наредби за преземање на потребни дејствија, меѓу кои за прибавување на податоци, обезбедување на траги од лице место и за обдукција на починатото лице.
Соседите велат дека се се случило многу бргу – ги чуле истрелите и додека сфатиле што се случува се било веќе завршено.

Неофицијално, убиството го извршиле двајца, а идентитетот на еден од нив и е познат на полицијата. Тие засега се во бегство.

И додека нема никакви официјални информации јавноста веќе почна да плете приказни за целиот случај – дека убиеното момче наводно имало криминално досие и било поврзано со подземјето, но и дека неговиот брат неодамна бил назначен за командир во единицата Алфа.

Се шпекулира дека целиот инцидент може да е поврзан и со новата агенција за обезбедување која се појави неодамна а за која предупреди колумнистот Сашо Ордановски.

Молкот во МВР ги подгрева ваквите приказни – за вечерашното убиство, пак, очевидците кои беа и премногу исплашени да говорат пред камера велат дека ги потсетило на Белград во 90-тите, дека им се чини како во Скопје да почнуваат да се случуваат мафијашки пресметки на сред улица и пред кафулиња.