Покетино: Мбапе ми кажа кога ќе донесе одлука за својата иднина

ПСЖ целосно се подготвува за големата пресметка во осминафиналето на Лигата на шампионите против Реал Мадрид.

Првиот натпревар овие екипи ќе го одиграат во вторник на Паркот на принцовите, а многумина веруваат дека ќе имаме спектакуларен дуел на екипите кои се меѓу главните фаворити за освојување на ова натпреварување.

Пред натпреварот помеѓу ПСЖ и Реал, во центарот на вниманието е Килијан Мбапе, кој на крајот од оваа сезона ќе го напушти францускиот клуб и очигледно кариерата ќе ја продолжи во Реал Мадрид.

За Мбапе вчера проговори и тренерот на ПСЖ, Маурисио Покетино, кој откри дека разговарал со младиот напаѓач и дека е сигурен дека Мбапе моментално е фокусиран само на ПСЖ.

„Разговарав со него за тоа и работата е јасна. Тој моментално е фокусиран само на ПСЖ. Тој ќе донесе одлука за својата иднина по дуелот против Реал Мадрид и тој самиот ми го кажа тоа. Гледам колку е фокусиран и мотивиран за конечно ПСЖ да го донесе трофејот во Лигата на шампионите“, изјави Покетино.

Да потсетиме, Мбапе има договор со Париз до крајот на оваа сезона и во неколку наврати одбиваше можност да ја продолжи соработката.

За него интерес покажаа многу европски великани, но се чини дека Мбапе одамна одлучил негов нов клуб да биде Реал Мадрид.