„Проколнатиот“ судија во недела на Милан му го суди мечот на сезоната, со него немаат победа на „Сан Сиро“ 12 години!

“Росонерите” на две кола пред крајот имаат два бода предност пред градскиот ривал Интер, а голем предизвик за тимот на Стефано Пиоли пристигнува в недела кога на “Сан Сиро” пристигнува секогаш незгодната Аталанта. Победата на Милан и евентуалниот пораз од Интер во Каљари ќе им ја донесе титулата на “Росонерите”, но многу е можно се да биде решено во последното коло.

Челниците на Серија А назначија и човек кој ќе ја дели правдата на овој натпревар. Се одлучија за најдобриот, па Даниеле Орсато в недела ќе го води мечот на теренот на Сан Сиро.

Сепак, овој искусен судија не е премногу среќен за Росонерите. Милан нема победа на Сан Сиро 12 години кога им суди, а последната победа ја забележа на 6 јануари 2010 година кога ја победи Џенова со 5:2.

Интересно е што Џенова беше предводена од актуелниот тренер на Аталанта, Џан Пјеро Гасперини, а навивачите на Милан секако се надеваат дека овој резултат ќе се повтори.

Треба да се напомене и дека Милан веќе осум години на домашен терен не ги совладал гостите од Бергамо. Последен пат славеа со 3:0 во јануари 2014-та година.

Оттогаш седум пати ја пречекаа Аталанта. Четири пати натпреварите завршуваа нерешено, а трипати славеше тимот од Бергамо.