Тони Надал: Федерер тешко ќе освои нова Грен слем титула

Чичкото и веќе поранешен тренер на Рафаел Надал – Тони, смета дека 37-годишниот Швајцарец, Роџер Федерер тешко ќе освои нова Грен слем титула.

На почетокот на годината, Федерер го освои Отвореното првенство на Австралија за рекордна 20-та титула од „големата четворка” во кариерата. Потоа Федерер за трета година по ред го пропушти „Ролан Гарос”, на „Вимблдон” отпадна по драматичен дуел со Кевин Андерсон, а на Ју Ес Опен претрпе шокантен пораз во четири сета од Австралиецот Џон Милман во осминафиналето.

– Не сум сигурен што можеме да очекуваме од 2019 година, но изгледа тешко ќе видиме како Федерер добива нов Грен слем трофеј. Сепак, морам да признаам дека сум го кажал тоа за него и во други случаи, а тој постојано ме изненадува, сподели Тони Надал во редовната колумна за „Ел Паис”.