Украинците во јуни ќе одиграат два домашни натпревари – еве каде ќе ги одиграат

Украинската фудбалска репрезентација во јуни треба да одигра два домашни натпревари во Лигата на нации.

Украинската фудбалска федерација соопшти дека националниот тим следните два натпревари ќе ги игра во Полска, пренесува „sport.ua“.

Украина на 11 јуни ќе се сретне со Ерменија, а три дена подоцна е закажан натпреварот Украина-Ирска, а двата меча ќе се играат во Лоѓ, Полска, во централниот дел на земјата, на општинскиот стадион ЛСК, кој има капацитет од само 5.700 седишта.

Украинската фудбалска репрезентација, која нема одиграно официјален натпревар од почетокот на воениот конфликт на нејзина територија, на 24 февруари, го победи германскиот тим Борусија Менхенгладбах со 2:1 во хуманитарен натпревар на 11 мај.

Да потсетиме, последниот официјален натпревар Украина го одигра на Билино поле, кога во 10. коло од квалификациите за Светското првенство ја совлада репрезентацијата на БиХ со 0:2 и се пласираше во плеј-офот.

ФИФА го одложи плеј-офот меѓу Шкотска и Украина за 1 јуни поради војната во Украина, а ќе се игра во Глазгов.

Победникот меѓу Шкотска и Украина ќе се сретне на 5 јуни во Кардиф против Велс во финалето на плеј-офот на Светското првенство, а победникот на овој турнир ќе игра во групата Б со Англија, Иран и САД.