Алегри не се согласува со начинот на употреба на ВАР технологијата

Тренерот на Јувентус, Масимилијано Алегри не се сложува со употребата на ВАР технологијата при сите спорни ситуации. Според него тоа може да ги пролонгира натпреварите и да ја „уништи“ динамиката.

– Ако сакаме фудбалот да биде спорт кој веќе не е вистински спорт, ајде да ја користиме технологијата за секој инцидент. Некаде во март, кога секој натпревар е одлучувачки, натпреварите можат да траат три или четири часа. Технологијата треба да се користи само во објективни ситуации, офсајди, кога топката е на гол-линија или не … Но кога станува збор за субјективни ситуации, луѓето никогаш нема стопроцентно да се согласат. Тоа е таков спорт, објасни Алегри.

Неговиот тим вчера одигра 2:2 со Аталанта. На Марио Манџукиќ му беше поништен гол по прегледувањето на видеото, бидејќи беше утврдено дека пред погодокот Лихштајнер го удрил Гомез со лакот.