Червар: Оваа екипа може чекор понапред без разлика на резултатите

Иако ракометарите на Металург имаат два порази во низа, сепак тренерот на тимот од Автокоманда, Лино Червар верува дека оваа млада екипа може да направи и подобри резултати во периодот кој претстои.

-Мора да имаме самодоверба и агресивна одбрана, ако сакаме повеќе. Како млада екипа имаме доста можности за напредок, но се се врти околу две работи – квалитетната одбрана, која може да ни донесе брзи голови. Немаме време за плачење, мора да играме. Оваа екипа може и да направи чекор напред оваа сезона, без разлика на резултатите, изјави Червар на денешната средба со медиумите.

Македонскиот вицепрвак Металург загуби од Монпелје во 1.коло од Лигата на шампионите, а вчера беше поразен и од Војводина во СЕХА конкуренцијата. Сепак, Червар гледа шанса за прв триумф оваа сезона во елитата лига и тоа веќе во недела кога во рамките од 2.коло на Лигата на шампиони, во Скопје гостува турскиот првак Бешикташ.

-По двата порази видовме многу работи кои треба да ги поправиме. Ова е важен меч за нас, играме прво со Бешикташ, а потоа следи дуел со Спортинг. Не чекаат тешки наптревари, мора да бидеме пофокусирани. Монпелје ни даде слика во што сме во дефицит и што треба да поправиме. Мора да играме подобра одбрана и да бидеме помоќни во колективната игра, дополни хрватскиот стручњак.

Натпреварот меѓу Металург и Бешикташ се игра в недела од 17 часот, во СЦ „Борис Трајковски“ во Скопје.