Џошуа бега како глувче од Деонтеј Вајлдер

Легендарниот боксер Ленокс Луис е последниот сопственик на сите четири шампионски појаси, а истите ги држеше во периодот од 1999 до април 2000 година. Но сега по толку години се чини дека се отвори можност да добие конкуренција. Меѓутоа Луис мисли дека Ентони Џошуа, сопственик на три појаси, всушност и не го сака четвртиот.

Џошуа „под свое“ ги има ВБА, ВБО и ИБФ појасите, додека четвртиот е во сопствеништво на Американецот Деонтај Вајлдер. И додека менаџерот на Џошуа, Еди Херн, тврди дека целта е борба со Вајлдер, легендарниот Ленокс Луис смета дека Џошуа всушност многу се плаши и бега од борба со Вајлдер.

• Тој не сака борба. Кога ја виде борбата на Вајлдер и Фјури сигурно помисли „О, па овие знаат да боксуваат“– вели Луис и дополнува:
• Очигледно е дека Џошуа бега како глувче од Вајлдер и Фјури. Според мене тие двајцата треба да имаат реванш меч, а Џошуа да почека. И не мислам дека тој ќе дојде во САД, сака да боксува во Англија затоа што знае дека таму е заштитен.

Се поизвесно е дека Џошуа нема да има борба со ниту еден од двајцата боксери. Вајлдер и Фјури по нерешената борба сакаат меѓусебен реванш, а следниот противник на Џошуа најверојатно ќе биде победникот од пресметката меѓу Дилијан Вајт и Дерек Чисоре.