Дибала го откри договорот на Јувентус за слободните удари

Паоло Дибала се најде во незгодна ситуација со доаѓањето на Кристијано Роналдо. Одличниот Аргентинец поминува повеќе време на клупата отколку што е навикнат, но кога игра – игра одлично.

Така на вториот натпревар од лигата на Шампионите запиша хет – трик против Јанг Бојс, а неговата одлична игра беше повод за интервју за „Gazzetta dello Sport“.

Една од поинтересните теми беше „пактот за слободни удари“ во Јувентус и неговата промена со доаѓањето на Роналдо во редовите на Старата дама.

Познато е дека Дибала и Пјаниќ беа стручњаците за изведување на слободните удари во Јувентус, но ова лето им се придружи и Роналдо, па сите претходни договори паднаа во вода.

„Минатата година Миралем и јас имавме пакт – ако слободниот е повеќе на лева страна би шутирал тој, а ако е на десна страна би го извел јас. Кога дојде Роналдо му напишав порака на Пјанич: Жал ми е Мире, но оваа година нема да изведуваш многу слободни удари“, изјави Дибала, па додаде:

„Шала на страна, знам како стојат работите. Кога слободниот е на десна страна шутира Кристијано, ние само стоиме тука и позираме за добра фотографија. И кај пеналите се знае хиерархијата – прво Роналдо, па јас и потоа Пјаниќ“.