Галатасарај го комплетираше трансферот на Лукас Тореира

Уругвајскиот играч за врска Лукас Тореира премина во Галатасарај на трансфер од Арсенал, објавија двата клуба. Тој потпиша четиригодишен договор со турскиот клуб, а медиумите во двете земји тврдат дека Англичаните ќе добијат околу пет милиони фунти за неговите права.

“Среќен сум што донесов одлука да се преселам во Галатасарај. Тоа беше добро осмислено. Со нетрпение го очекувам почетокот на новата авантура. Се надевам дека ќе се навикнам на градот, клубот и моите соиграчи што побрзо Едвај чекам да почнам да тренирам“, рече тој за клупскиот канал на Јутјуб.

Тореира му се приклучи на Арсенал во јули 2018 година како трансфер од Сампдорија и има забележано скоро 90 настапи за клубот. Сепак, последните две сезони ги помина на позајмица во Атлетико Мадрид и Фиорентина.

Галатасарај во понеделникот го комплетираше и трансферот на Дрис Мертенс, кој потпиша договор до следното лето. 35-годишниот Белгиец беше донесен како слободен играч откако последните девет сезони ги мина во Наполи и постигна 148 голови.