Гатусо: Плативме за нашите грешки

Тренерот на Милан Џенаро Гатузо изјави, по поразот од Јувентус во Купот на Италија (4: 0), дека конечниот резултат не е вистински одраз на она што се случуваше на теренот и дека неговите играчи изгубија поради сопствените грешки.

Јувентус оствари убедлива победа и го освои Купот на Италија, а два од четири гола постигна по големи грешки голманот на Милан, Џанлуиџи Донарума. Гатусо вели дека тимот платил за грешките и ќе мора многу да научи.

„Тоа е фудбал, резултатот не е вистинската мерка за она што го покажавме на теренот, но ги плативме грешките. Во првите 56 минути не му оставивме простор за ниту една шанса на Јувентус, освен на ударите со глава на Манџукиќ. Мораме да ги прифатиме нашите грешки и конечниот резултат“ рече Гатусо и продолжи:

„Јас сум млад тренер, се уште учам, Правам грешки и морам да откријам како да ги поправам за да напредувам во иднина. Не треба да гледаме на резултатот 4:0, туку како тоа се случило и како тоа да го спречиме подоцна“.

Да го освоеја Купот на Италија, фудбалерите на Милан ќе одат директно во групната фаза од Лигата на Европа, а сега ќе мора да играат квалификации за ова натпреварување.