Икер беше помал од зрно грашок

Повторно тензична атмосфера на релација Жозе Мурињо – Икер Касиљас. Тренерската ера на Жозе Мурињо во редовите на Реал (М) од 2010 до 2013 година, покрај големиот број на контроверзни ситуација, помина и во знакот на вербалните караници со Икер Касиљас.

Шпанските медиуми постојано тврдеа дека меѓусебниот однос помеѓу Португалецот и Шпанецот е максимално професионален, но полн со омраза. Касиљас не криеше дека има нешто против околу традиционалните методи на Мурињо кои ги користеше за време на кризните ситуации.

“Специјалниот” пак беше убеден дека легендарниот голман е во постојан контакт со медиумите на кои им ги открива пикантериите од соблекувалната, а беше наречен и “крт”.

Дека и понатами не можат да се помирисаат говори новата вербална војна помеѓу нив двајца.

• Во времето на Мурињо, тензиите со Барселона беа подигнати на максимално ниво, можам да кажам дека беа на едно болно ниво. Тоа не беше мадридизам со кој јас израснав. Не сакав да правам драма за доброто на Реал (М). Сега, кога подобро ќе размислам, ќе заклучам дека сум направил грешка. Требаше да го подигнам мојот глас и да му се спортиставам на Мурињо. Требаше бикот да го фатам за роговите, изјави Касиљас.

Поранешниот репрезентативец на Шпанија откри и во какви односи бил со португалскиот стручњак.

• Постоеше граница која ја помина и не сакав да го толерирам. Во неговата трета сезона работите не беа добри. Иако претходната сезона ја освоивме Примера, имаше многу фудбалери со нарушени меѓусебни односи. Мојот однос со Жозе не беше добар за никого. Сакав да ги почитувам клупските вредности и се подредив на ситуацијата. Денеска би постапил сосема различно, додаде Касиљас.

Сосема очекувано, одговорот на Мурињо пристигна за само неколку часа.

• Сега може да зборува се што сака. Неговите изјави се својствени за некој кој е на крајот од својата кариера. Претходно молчеше и се криеше. Повеќе ќе сакав да ми се обрати, да ми каже во лице тоа што сега го мисли. Сепак, немаше храброст. Беше помал од зрно грашок. Не ја збори вистината, лаже дека не ми се спортиставил. Тоа го направи на најдобриот можен начин за него. Позади грб, изјави Мурињо.