Клоп: Многумина не отпишаа

Ливерпул го совлада Шефилд Јунајтед со 2:0, прекинувајќи ја серијата од четири порази во Премиер лигата.

Јирген Клоп конечно имаше причина да биде задоволен, а Ливерпул сега е на шестото место со 43 бода, дури 19 помалку од лидерот Манчестер Сити.

Тој ќе се бори само за место кое води во Лигата на шампионите.

„Многумина не отпишаа, но и тоа е во ред. Со сите проблеми што ги имаме, сепак сме тука. Треба да продолжиме да победуваме, за да играме во Лигата на шампионите следната сезона“, рече Клоп.

Тој го пофали Куртис Џонс кој постигна еден гол.

„Врвен играч, тој игра сега така. Но, има многу простор за подобрување“.

Следниот натпревар на Ливерпул е против Челзи во четврток.