Кој ќе го пренесува финалето од купот на Македонија?

Како ништо да не се случува…Како еден обичен ден кога има натпревар од ПМФЛ (Првата Македонска Фудбалска Лига)… Како да не е финале и голема завршница на сезоната и долгото европско лето…

Како спортот да не е важен, како…

Вечерва е финалето од Купот на Македонија, а ниту на телевизија, ниту фудбалската федерација, ниту пак на социјалните мрежи се појави реклама, најава, информација за тоа кој, кога, како и колку ќе го пренесува финалниот натпревар од купот на Македонија.

Вечерва и во Србија си игра финалето од купот. Младост со Партизан ќе ги одмерат силите, а ние повеќе информации имаме за тој натпревар отколку за нашиот кој се игра во Струмица, иако сме една педа земја.

ФФМ (Фудбалската федерација на Македонија) на својата интернет страница излезе само со соопштение во кое најави дека ФФМ ќе обезбеди пренос со знаковен јазик, а каде ќе може тој директен пренос да го гледаме, се уште нема информација иако се наоѓаме на неколку часа од почетокот на натпреварот. Во делот за директен пренос на веб страницата на ФФМ нема никаква најава за пренос.

Минатата година финалето од стадионот во Струмица го пренесуваше Телевизија Нова, но последните промени во телевизијата и заминувањето на вработените, како и неколкуте неисплатени плати за жал нема да имаме можност да го следиме на овој канал директниот пренос.

По престанувањето ТВ Нова да ги емитува натпреварите од ПМФЛ, ТВ 24 ги презеде директните преноси. Но во овој момент ниту на нивната веб страница, ниту на социјалните мрежи има некаква најава за директен пренос.

Додека во светот од вакви настани се раздвижува економијата, за жал кај нас не знаеме да го организираме едно финале, а да не зборуваме за другите работи.

Наместо ние да ве информираме каде да го гледате финалето еве ве прашуваме вас, каде да го гледаме финалето?

РЕДАКЦИСКИ СТАВ