Други спортови
Леклер нема да му угодува на Фетел
Еден од највлијателните луѓе во Формула 1, Британецот Рос Браун, предвидува голема нетрпеливост во Ферари идната сезона меѓу Себастијан Фетел и новиот клупски колега Карл Леклер.
Сезонава Кими Раиконен и Ферари се разделија, а тимот од Маранело се реши за ангажман на надежниот и млад возач Леклер. Имено, Рос Браун гледа нешто подалеку и предвидува дека Леклер нема да биде новиот Раиконен и дека ќе сака да биде посамостоен на патеката, односно да не биде во сенка на првиот возач, односно Фетел.
- Не можам да замислам како Леклер би можел да му угодува на Себастијан Фетел на патеката како што тоа го правеше Кими Раиконен. Кими секако е свој човек, да не ме сфатите погрешно, но мислам дека знаеше која е неговата улога во тимот, додека беше во Ферари. Себастијан имаше бурна 2018 година. Имаше навистина добри перформанси, во половина од првенството беше во водство, но на крајот, тој и тимот не испорачаа резултати по мерка. Имаа силна година, но мора да го направат големиот чекор идната сезона, мора да испорачаат успех, смета Браун.