Ракомет
Металург го скрши мразот против руските мечки
Македонскиот ракометен вицешампион екипата на Металург, ја забележа првата победа во Лигата на шампионите, откако го совлада рускиот тим Чеховски Медведи со 25:24, во рамки на 6. коло од групата Ц.
Без Халил Јагањац, засилен со трите нови имиња во своите редови (Александар Шпенде, Миха Пучник и Гонзало Рибеиро), тимот од Автокоманда конечно ги прокнижи првите бодови во најквалитетното клупско ракометно натпреварување во Европа.
Меѓу стрелците најпрецизен беше Димитар Димитриоски со пет гола, а по четири погодоци запишаа Токиќ, Серафимов и Шпенде. Кај Чеховски Медведи најефикасен беше Тмофеј Маслеников со седум гола.
Следен предизвик за „металурзите“ во Лигата на шампионите ќе биде дуелот со Спортинг за четири дена, повторно во Скопје.
ФОТО: Наке Батев
