Нерешено меѓу Шпанија и Бразил, Германија го „прегази“ Уругвај, а исто така славеше и Аргентина

Првиот натпревар во групата Б на Светското првенство во ракомет помеѓу Шпанија и Бразил донесе многу возбудувања, а на крајот немаше победници (29:29).

Бразил многу подобро го отвори мечот, поведувајќи со 4:0, но Шпанија брзо одговори, па неколку минути подоцна резултатот беше 6: 6.

Шпанија до првата предност стигна на средината на првото полувреме (8: 7), а до паузата успеа да ја зголеми на 16:13.

Шпанците продолжија со добра игра и во второто полувреме, и во неколку наврати имаа и предност од шест гола разлика, но Бразил успеа да се врати, а и на крајот можеше дури и да слави затоа што имаше предност во финишот (29:28). Но, на крајот, бодовите беа поделени.

Најефикасни кај Шпанија беа Канељас, Фернандез и Соле со по четири гола, додека кај Бразил најефикасни беа Мораеш и Лангаро со по шест гола.

Да додадеме дека Германија лесно го совлада Уругвај (43:14), додека Аргентина беше подобра од ДР Конго (24:18).