Пјер Гасли го менува Рикардо во Ред Бул

Францускиот возач Пјер Гасли ќе го замени Даниел Рикардо во тимот на Ред Бул следната година во Формула 1.

Рикардо веќе објави дека ќе вози за Рено од 2019 година, а неговата замена доаѓа од вториот тим на Ред Бул – Торо Росо, од кој пред неколку години дојде и Макс Верстапен.

– Ова е неверојатна можност и нов чекор во моите амбиции да победувам во трки и да се борам за титулата, рече по тој повод Гасли.

Тој дебитираше во Ф1 минатиот октомври во Малезија, а оваа сезона освои 26 поени. Неговиот најдобар резултат беше четвртото место во Бахреин.

Од друга страна, Ред Бул сезонава се бори да биде постојан, но неговите возачи постигнаа три победи досега – Рикардо две и Верастепен една.

По неколку недели од летниот распуст, сезоната во Формула 1 продолжува претстојниов викенд со Гран-при на Белгија на легендарната патека во СПА.