Руни индиректно го прозва Роналдо: Неприфатливо е ова што го прават

Деновиве не е лесно да се биде навивач на Манчестер Јунајтед, па не му е лесно на поранешниот играч на овој клуб Вејн Руни кој е многу приврзан за Олд Трафорд.

Руни во свое време освојуваше трофеи, а потоа Јунајтед играше исклучителен фудбал, но денес овој тим и покрај одличните фудбалери доживува дебакл по дебакл, а врв беше поразот од 5:0 од лутиот ривал Ливерпул на сопствениот стадион.

Најголем виновник за многумина е менаџерот Оле Гунар Солскјаер, кој очигледно е пред отказ и се смета дека дуелот со Тотенхем е решавачки викендов.

Во меѓувреме, Руни, кој будно ги следи случувањата во својот поранешен клуб, вината ја префрла на поединечни играчи, а меѓу редови може да се прочита дека критиките се упатени и кон Кристијано Роналдо, кого медиумите и спортската јавност во Англија го обвинуваат за слаби дефанзивни перформанси, односно не и помага на одбраната кога е потребно.

„Не беше лесно да се гледа овој натпревар. Забележав премногу играчи кои не беа подготвени да трчаат и да работат во одбраната. Имаше премногу кои не дадоа се од себе за дресот на клубот, а тоа е недозволиво! Ова се одлични фудбалери, но мора да дадат повеќе за Јунајтед“, изјави Руни за англиските медиуми.

Роналдо неодамна повторно одговори на критиките во едно интервју, велејќи дека негова работа е да игра напад и да постигнува голови, а не одбрана. Сепак, во Манчестер не можат и нема да дозволат поединец да биде поголем од клубот и сите заедно ќе треба да се потрудат да ја надминат кризата и овој тим конечно да почне да се бори за титули, што не беше случај долго време.

Руни и Роналдо играа заедно, беа пријатели, но на поранешниот англиски репрезентативец очигледно не му е проблем отворено да зборува за проблемите во неговиот омилен тим, дури и ако еден од тие проблеми е Португалецот со кој ја делеше соблекувалната и среќните моменти.