Шок во Неапол: Специја го победи Наполи по пресвртот

Наполи претрпе изненадувачки пораз на домашен терен вечерва против Специја (1:2) во мечот од 16-тото коло на Серија А.

Наполи беше апсолутен фаворит вечерва на стадионот Диего Марадона, но Специја со неверојатен пресврт успеа да го направи најголемото изненадување во оваа рунда.

Во првото полувреме домаќините имаа неколку одлични можности преку Фабијан Руиз и Матео Политано, но немаше голови. Лоренцо Инсиње ја пропушти најдобрата шанса во 37. минута кога шутираше силно од десетина метри, но голманот на Специја одлично ја одбрани.

Во второто полувреме доминираше и Наполи, кој се закани во 55. минута кога Петања имаше шанса, но овој пат голманот на гостите успеа да ја зачува својата мрежа.

Сепак, три минути подоцна немаше спас за гостите. Во центарот на вниманието повторно беше Петања, кој овојпат постигна одличен погодок за 1:0.

Тогаш се чинеше дека Наполи ќе дојде до победа, но Специја ги шокираше сите во продолжението од мечот. Гостите израмнија во 68 минута кога Нзола погоди од белата точка.

Гостите стигнаа до последниот пресврт на осум минути пред крајот на играта. Побега истрча на блокираната топка и погоди за 1:2 и одлично славје за играчите на Специја. До крајот на натпреварот Наполи се обиде да добие барем бод, но не успеа.

Наполи остана петти на табелата со 28 бода, додека Специја сега е на 16-та позиција со 14 бода.