Циркус во режија на Ла Лига, стигна одлуката, Левандовски суспендиран, нема да игра на дербито во Мадрид

Тешко е да се објасни како делува Ла Лига во некои ситуации, а ова е уште еден случај во серија – Роберт Левандовски е вратен со суспензија од три натпревари.

Да потсетиме, поради црвениот картон добиен на последниот меч пред паузата, Левандовски првично беше суспендиран на три натпревари, а потоа ден пред мечот со Еспањол суспензијата му беше привремено одложена додека Арбитражниот суд за спорт не направи конечна одлука.

Поради таквиот циркус, Еспањол прво се побуни, што беше сосема логично, бидејќи челниците на Ла Лига имаа речиси два месеци да го решат случајот и тоа не го направија.

И Чави Ернандез имаше што да каже, бидејќи цело време се подготвуваше за натпреварот без Левандовски, а потоа само 24 часа пред натпреварот беше донесена чудна одлука да се одложи се и повторно да не се знае кога ќе може да смета на Полјакот.

И сега стигна конечната одлука, судот ја потврди одлуката на Ла Лига, Левандовски беше суспендиран на три натпревари и ќе ги пропушти следните три, веќе неделното дерби со Атлетико во Мадрид, а потоа и Хетафе и Џирона.

Чави може само да биде среќен што Левандовски следната недела ќе може да игра во Суперкупот на Шпанија во Ријад, бидејќи забраната важи само за првенствени натпревари.