Виери му ја затвори устата на италијанските клубови за Кристијано Роналдо

Легендарниот италијански напаѓач Кристиан Виери се огласи денеска и го коментираше потегот на Јувентус за тоа што во своите редови го донесе Кристијано Роналдо.

Роналдо изненади многумина со одлуката да го напушти Реал Мадрид и да потпише за Јувентус, а некои клубови во Италија оваа вест не ја дочекаа најдобро. Јуве во Серија А доминира веќе неколку години и доаѓањето на Роналдо сигурно само ја отежнува ситуацијата за другите клубови кои сакаат да ја прекинат доминацијата на „Старата дама“.

Виери во изјава за италијанските медиуми кажа дека единствено не му е јасно за тоа како некој може да каже дека Роналдо касно стигна во Јувентус и дека е престар за да игра како во дресот на „Кралскиот“ клуб.

„Кристијано Роналдо има 33 години и дојде во Италија. Сите зборуваат дека е премногу стар и дека Јувентус погрешил што за него даде 100 милиони евра. Тоа се глупости затоа што останатите клубови се само љубоморни на фактот дека Јувентус сега во своите редови има еден од најдобрите играчи на светот“, рече Виери.