Волф: Допрва ќе сфатиме колку е големо ова достигнување

Директорот и акционер на тимот на Мерцедес во Формула 1, Тото Волф, ги претстави рекордните 100 победи на Луис Хамилтон како неверојатно достигнување. Во неделата, седумкратниот светски шампион го освои Гран-при на Русија и стана првиот возач во историјата што стигнал до трицифрен број на триумфи во Ф1.

„Тоа е неверојатно достигнување. Сведоци сме на неверојатна кариера. Сто победи е нешто извонредно. Денес, зборуваме за тоа достигнување, кое ќе биде во вестите во следните 24 часа, но само за неколку години ќе сфатиме дека сме сведоци, а во нашиот тим, актери на нешто историско“, рече Волф.

„Треба да разбереме дека во овој момент сме дел од патување кое ниту еден друг возач во Формула 1 не го имал. Ова достигнување е поголемо од победите и бројот на титули што ги освоивме заедно“, заврши Австриецот.

Со триумфот во Сочи, Хамилтон се врати на првото место во рангирањето на возачите со два бода предност пред Холанѓанецот Макс Ферстапен од тимот на Ред Бул.