Жиру: Загрижен сум за можноста да играме без навивачи

Напаѓачот на Челси, Оливие Жиру изјави дека е загрижен за играњето без навивачи, но сепак е среќен што повторно е со своите соиграчи. Англискиот фудбал продолжува на 17 јуни по речиси 3 месеци пауза поради коронавирусот, но како и во другите лиги каде првенствата продолжија и таму каде што допрва треба да продолжат, на стадионите нема да има гледачи.

„Почнавме да тренираме на 19 мај. Одлично е да се вратиме на теренот, повторно да ги гледаме нашите соиграчи и само да играме фудбал. Ми недостасуваше сето тоа“, рече Жиру во интервјуто за официјалната веб-страница на УЕФА.

Тој вели дека сè е многу невообичаено, откако работат во групи од пет лица и неопходно е да се задржи растојание од најмалку два метра, што значи дека физичкиот контакт е исклучен.

“Двапати неделно се тестираме за коронавирус. Не користиме простории за сместување, не се тушираме. Мораме да се пресоблечеме пред да заминеме дома. Покрај тоа, во моментов е многу жешко … Не се жалам, но многу се потиме! Ми недостасуваат натпреварите, адреналинот, навивачите. Загрижен сум за можноста да играм без публика. Но, сè е добро, сите роднини се здрави, така што не е редно да се жалам“, рече францускиот напаѓач.