Бевме на погрешно место, во погрешно време – Навивачот на Левски кој беше прободен во Чаир излезе од болница и раскажа што доживеале во Скопје (ВИДЕО)

„Јас сум жив и здрав. Бев отпуштен синоќа. И сега се враќам во мојата нормална рутина. Стапнувам на нозе. Ги учиме лекциите и одиме напред“, вели Драгомир Андонов, навивач на Левски, кој има 29 години, а кој беше прободен во Чаир при инцидентите кога бугарскиот тим гостуваше на Шкупи.

Тој бил ранет во црниот дроб и во првите часови постоела опасност по неговиот живот. Вели дека залутале во тој дел на градот и дека воопшто не провоцирале. Навивачот на Левски вели дека биле на погрешно место, во погрешно време.  Нападот се случил додека чекале на семафор.

„Не направивме апсолутно никакви провокации. Сообраќајот беше се погуст. Имаше семафор. Стигнуваме до раскрсница и се фаќаме во сообраќаен метеж – автомобилот сега тргнува, па застанува. Стоиме мирно и чекаме. Седам зад совозачкото седиште и од страна забележувам момче на околу 25-30 години како оди покрај колата. Го гледам на ниво со прозорецот и почнува да ме влече. Посегна по мојот шал и почна да влече. Кога се обидов да се повлечам, одговорот беше удар во окото. Бев помодрен и отечен. Постојано влечеше, не се откажуваше. Решив да ја отворам вратата. Момчињата почнаа да се спуштаат надолу. Повеќе луѓе се собраа зад момчето што го влечеше шалот. Еден од нив извади дрвен стап и со него ме удри по главата. Почнаа да пристигнуваат повеќе луѓе. Имам три конци“, истакнува Драгомир и додава:

„Отидовме за забава. Беше во близина мечот, соседна земја, многу адреналин и искуство е да навиваш за твојот омилен клуб. Ние не сме од оние навивачи кои одат на натпревари за да прават проблеми – хулигани, вандали кои ја расипуваат агендата, прават проблеми. Се разликуваме од нив“, посочува тој.