Чеферин: Политиката ќе одлучи, а не спортот, но ќе ни се врати стариот добар фудбал

Претседателот на УЕФА, Александар Чеферин уверува дека наскоро ќе го имаме стариот добар фудбал, но предупредува дека „спортот нема да одлучи, туку тоа ќе биде политиката“.

УЕФА е посветена на продолжување на европските натпреварувања и националните првенства оваа сезона, но е свесна дека конечната одлука не е во нејзини раце.

„Човештвото ќе го победи коронавирусот. Видовме колку е чувствителен и ранлив нашиот свет кога успеа целосно да го дестабилизира. Фудбалот е составен од позитивна енергија и додека не се врати фудбалот, луѓето нема да имаат перцепција дека ситуацијата е нормална“, рече Чеферин.

„Фудбалот ќе се смени, но само кратко. Веќе преживеал војни и епидемии во минатото. Наскоро ќе го имаме стариот добар фудбал. Би сакале да го видиме фудбалот што е можно поскоро на теренот, но пред сè тоа зависи од одлуките на државните органи. Со сите медицински потреби и зад затворени врати, натпреварите би можеле да се вратат релативно брзо. Сепак, спортот нема да одлучува, туку политиката“.

Засега, од најголемите сили само Франција и Холандија ги суспендираа првенствата, а останатите се борат повторно да играат до крајот на месецот или во јуни.