Георгиевски: Ветивме медал, донесовме сребрен, но уверен сум во Париз 2024 година ќе биде злато (ВИДЕО)

Македонскиот херој на Олимпијадата во Токио, кој освои сребрен медал во таеквондо +80 килограми, Дејан Георгиевски, денеска се обрати пред луѓето на плоштадот кои дојдоа да го поздрават неговиот успех.

„Немам зборови со кои можам да го опишам чувството. Мојот тренер Дарко Костовски, од трибините ми даваше дополнителна енергија во секоја борба кога ми беше најпотребно. Од почетокот е со мене и многу карактеристики ги прифатив од него. Другиот тренер Борче Костовски е исто така „виновник“ за медалот од Олимпијадата. Тој ја направи прецизно стратегијата која не донесе до успехот. Благодарност до семејството кое ми даваше безрезервна поддршка. Ветивме златен медал, донесовме сребрен, но уверен сум во Париз 2024 година ќе биде злато. Како и да е ветувањето за медал го исполнивме.

Сигурен сум дека на следните Олимписки игри ќе имаме повеќе А-норми и медали, посебно во таеквондо. Им посакувам успех на другите Македонци кои останаа во Токио. Посакувам да ја израдуваме Македонија повторно. Да живее Македонија“, истакна Георгиевски во обраќањето до присутните во центарот на Скопје.

Георгиевски попладнево се врати од Токио, а во текот на денот имаше средба со директорот на Агенцијата за млади и спорт Наумче Мојсовски.