Ибра претставен во Милан: На 38 години имав повеќе понуди отколку на 28!

Тој вчера слета во Милано, подготвен да започне одново во Серија А. Златан Ибрахимовиќ беше претставен како засилување на „Росонерите“, и покрај големите очекувања, еве ја неговата изјава на прес-конференцијата:

„Ги чувствувам очекувањата, имам добар однос со навивачите. 50% од она што го правиме е нивно. Со поддршка на навивачите полесно е да се прават добри работи во фудбалот. Подготвен сум да играм денес. 

По последниот натпревар за ЛА Галакси, ме повика Малдини. Разговаравме за тоа како бев и за други нормални работи. На 38 години имав повеќе понуди отколку кога имав 28 години. Го барав адреналинот во мене за да извлечам максимум од себе. Многу разговарав со Бобан, потоа помина еден месец, а после Аталанта имавме многу телефонски комуникации. Не беше тешка одлука. 

Во 2012 година останав без мојата желба, но ситуацијата беше таква и немаше ништо што можев да направам за тоа. Милан ми даде среќа да играм фудбал по Барселона. Доаѓам да ги подобрам работите. Сум го видел тимот однадвор. Сегашниот Милан има квалитет. Резултатите не се добри, но првенството е маратон, а не спринт. Лично, јас не ја изгубив страста за она што го правам“.