Коронавирусот ја прекина сезоната во ракомет, оваа година Македонија нема да има шампион

За прв пат во историјата на нашата земја нема да заврши една ракометна сезона. РФМ одлучи да го прекине натпреварувањето во сите конкуренции, откако претседателот на државата Стево Пендаровски, а на препорака на владата прогласи нова 30-дневна вонредна состојба на целата територија.

-Земајќи ја во предвид прогласената вонредна состојба во државата како и продолжувањето на истата заклучно со 15.05.2020 година, дополнително и самиот факт дека поголемиот број договори на ракометарите/ките со клубовите имаат валидност заклучно до 31.05.2020 година како и насоките од Европската Ракометна Федерација за завршување на националниот систем на натпревари до 31.05.2020 година, се наметнува заклучокот дека моменталната состојба не дозволува и не постојат реални услови за регуларно завршување на домашното првенството.

За сезоната 2019/2020 година ќе биде доставен предлог до УО на РФМ да нема прогласување на победник во националниот систем на натпревари во сите конкуренции и категории, истиот предлог ќе биде доставен и за Куп на Македонија 2020 година.

Местата во Европските клубски натпреварувања во ЕХФ и местата во регионалната Сеха Лига ќе бидат распределени согласно критериуми од страна на УО на РФМ, се вели во известувањето од РФМ.