Мијатовиќ: Влошените односи со Перез го натераа Роналдо да замине

Трансферот на Кристијано Роналдо од Реал Мадрид во Јувентус го одбележа ова лето на фудбалскиот пазар.

После девет години Португалецот ги напушти „Кралевите“, а во европските медиуми многу се зборуваше за тоа зошто Кристијано баш во овој момент реши да ги напушти „Кралевите“.

Одговорот на ова прашање го даде некогашниот фудбалер и спортски директор на Реал Предраг Мијатовиќ. Тој истакна дека односите помеѓу претседателот на Реал Флорентино Перез и најдобриот фудбалер на светот бе сериозно нарушени.

„Не верувам дека одлуката за заминување на Роналдо е лесно донесена. Тоа е крајниот резултат на нешто што долго се „крчкаше“. Голема е веројатноста дека Роналдо замина поради чудниот однос на претседателот Флорентино Перез“, рече Мијатовиќ и додаде:

„Не знам точно што се случи помеѓу нив, но гледајќи од страна, ми делуваше дека имаа сериозни проблеми и дека односите им беа нарушени. Тоа е така без никакви дилеми“, истакна Мијатовиќ.

Роналдо во текот на својата девет годишна кариера во Реал ги сруши сите рекорди. Постигна 450 голови на 438 натпревари, а освои и четири наслови најдобар фудбалер на светот во дресот на овој тим, и речиси сите можни трофеи.