Одложувањето на Игрите во Токио чини скоро 2 милијарди долари. Сè уште не е познато кој ќе плати за тоа

Одложувањето на Олимписките игри во Токио предизвикано од пандемијата на коронавирусите чини околу 200 милијарди јени или 1,9 милијарди долари, пренесува весникот „Јомиури“, повикувајќи се на проценка на организаторите.

Меѓународниот олимписки комитет (МОК) и јапонската влада беа принудени да ги одложат Олимписките игри во март, бидејќи коронавирусот започна неконтролирано да се шири низ целиот свет.

Игрите требаше да чинат 1,35 трилиони јени (13 милијарди долари) пред одложувањето, пишува Јомиури, а доцнењето ќе чини дополнителни 1,9 милијарди долари.

Организацискиот одбор ќе донесе одлука за распределување на финансискиот товар на доцнењето во декември, по разговорите меѓу МОК, градската влада во Токио и централната јапонска влада.

Трошоците за одложување вклучуваат плаќања на вработените, како и нов систем за враќање на билетите, но не вклучуваат мерки за спречување на ширење на коронавирус.