Партизан ја оствари најголемата победа во историјата на АБА лигата! (ВИДЕО)

Партизан синоќа  во 15. коло од регионалната АБА лига го совлада Сплит со неверојатни 109:49.

Во првата четвртина од овој дуел Сплит донекаде се држеше со оглед на тоа што белградски имаше предност од „само“ 17:12.

Сепак, во вториот дел хрватскиот тим постигна само пет поени и на полувреме Партизан замина со предност од 51:17 и уште тогаш беше решено прашањето за победникот.

Во вториот дел предноста на белграѓани само растеше и на крајот беше забележана најубедливата победа во историјата на АБА лигата.

Досега рекордот го држеше Цедевита кога во 2016 година го совлада Задар со 58 разлика, 120:62.

Исто така, треба да се каже дека Сплит на ова гостување пристигна десеткуван со само осум играчи, па тоа секако им е олеснителна околност.

Седум кошаркари на домашната екипа постигнаа двоцифрен број на поени, а во Сплит само еден – Пократок. Сани Чампара постигна само три поени, сите од линијата за слободни фрлања.

Партизан моментално е втор на табелата со 26 бодови, бод помалку од првопласираната Црвена звезда, додека Сплит е на претпоследното, 13. место, со 17 бодови, колку што имаат Мега Баскет и последнопласираната Крка.

Во следното коло Партизан ќе игра против Студентскиот центар, додека Сплит ќе биде домаќин на Будуќност.