Пјаниќ „отпишан“ во Торино? Покрај Барселона, Јувентус преговара со два други клуба

Италијанските медиуми во претходните денови пишуваа дека Миралем Пјаниќ ќе го напушти Јувентус на крајот на сезоната и својата кариера ќе ја продолжи во Барселона.

Наводно, Барселона и Јувентус преговараат за трансфер на Пјаниќ, а договорот треба да вклучува најмалку еден фудбалер од каталонскиот клуб.

Според шпекулациите, во игра се Иван Ракитиќ, Артуро Видал и Артур Мело, кои јавно кажаа дека не сакаат да го напуштат „Камп Ноу“. Сепак, „Скај Спорт“ Италија носи нови вести за Пјаниќ, а тоа е дека Јуве не преговара само со Барселона.

Како што изјавуваат, Пјаниќ сигурно ќе ја напушти „Старата дама“ ова лето, но прашање е каде ќе ја продолжи кариерата. Скај Спорт пишува дека Јувентус веќе некое време преговара со Барса, но дека во игра се уште два клуба.

Наводно, станува збор за ПСЖ и Челси со кои Јувентус исто така преговара за размена на играчи. Тие сакаат да го доведат Жоржињо од Челси и се подготвени да го испратат Пјаниќ во Лондон, додека во преговорите со ПСЖ го нудат играч од средниот ред во замена за Леандро Паредес.