По нередите во Албанија депортирани се 80 навивачи, а повредени се 19 полицајци

Најмалку 80 фудбалски навивачи се депортирани назад во Италија по жестоките судири во Тирана, во пресрет на вечерашното финале на Конференцијата во Лигата на УЕФА меѓу Рома и Феенорд, соопшти албанската полиција.

Тирана, главниот град на Албанија, во среда ќе биде домаќин на финалето на Конференциската лига, ново натпреварување на Европската фудбалска асоцијација (УЕФА), за чиј трофеј на стадионот Ер Албанија ќе се борат италијанска Рома и холандски Феенорд. Ова е трето најсилно клупско натпреварување во организација на УЕФА, зад Лигата на шампионите и Лигата на Европа, кои започнаа во сезоната 2021/22.

Групи холандски и италијански навивачи се судрија со полицијата во вторникот вечерта, при што беа повредени 19 полицајци и петмина албански цивили. Еден полицаец е повреден во напад со нож, соопштија властите.

Повредени се и тројца италијански навивачи и двајца холандски навивачи.

Заменик-началникот на полицијата Алберт Дервиши во средата ги повика италијанските и холандските навивачи „да се однесуваат како европски граѓани, да ги почитуваат албанските закони и да не се судираат со полицијата, бидејќи во спротивно законите ќе бидат строго спроведени“.

Дервиши рече дека се приведени 48 италијански и 12 холандски навивачи, додавајќи дека секој што ќе биде уапсен може да се соочи со казна затвор до седум години.