УЕФА му ја зголеми казната на Самир Насри

УЕФА одлучи да ја зголеми казната на францускиот фудбалер Самир Насри поради користење третман кој не соодветствува на регулативата на Светската антидопинг агенција (ВАДА).

Насри во февруари доби суспензија од шест месеци, но по жалбата на дисциплинскиот инспектор во УЕФА таа сега е продолжена на 18 месеци.

Фудбалерот беше казнет бидејќи во 2016 година имал интравенски третман на клиника во Лос Анџелес со недозволени имунолошки средства под изговор дека дехидрирал.

Во соопштението од УЕФА стои дека казната е зголемена и официјално тече од први јули 2017 година.

Последен клуб на Насри му беше Анталијаспор, со кој го раскина договорот во текот на зимската пауза, а има настапувано за Арсенал, Манчестер сити, Марсеј и Севиља.