Вардар потврди салата „Јане Сандански“ затворена за навивачи

Актуелниот европски првак Вардар соопшти дека, поради одлуката на Владата, нивните мечеви во наредните 30 дена ќе ги играат без публика. Тоа значи дека против Нексе во СЕХА лигата и против ПИК Сегед во Лигата на шампионите, салата „Јане Сандански“ ќе биде празна.

Одлуката ја донесе вчера Владата со цел превенција на ширењето на коронавирусот.

Целосно соопштение на РК Вардар:

„Ги известуваме сите навивачи и симпатизери на РК Вардар дека во следните 30 денови сите натпревари на кои нашиот клуб е домаќин ќе се играат без присуство на публика.

Одлуката е донесена од Владата која забрани присуство на гледачи (публика) на сите спортски настани на територијата на Македонија, во наредните 30 дена како дел од дополнителни мерки и активности за превенција од ширење на корона вирусот по сугестија на Комисијата за заразни болести на Министерството за здравство

Истото се однесува за сениорските екипи и сите екипи во младински категории.

Поради истата мерка нема да имаат тренинзи и натпревари ниту членовите на Ракометната Академија на Вардар.“