Во Италија му „простија“, ама се чини УЕФА не, Јувентус ќе биде исфрлен од Европа!?

Како што Италијанската фудбалска федерација го израдува Јувентус со враќањето на 15-те бодови одземени поради наводна финансиска измама, сега „старата дама“ добива лоши вести од УЕФА. Италијанскиот весник „Газета дело Спорт“ пренесува дека УЕФА ги следи случувањата во Јувентус и би можела дури и да ги исклучи од нивните натпреварувања за следната сезона, секако под услов да се утврди дека навистина ги „наместиле“ финансиските извештаи.

Истрагата што ја спроведува самата УЕФА е во тек и ќе утврди дали Јувентус ја зголемил финансиската добивка со „сомнителни трансфери“ и на тој начин успеал да направи измама во финансискиот фер-плеј, што може да биде страшен удар за клубот од Торино.

Да потсетиме, на Јувентус му беа вратени бодовите кои му беа одземени во Серија А (минус 15) по прифатената жалба, па сега е закажано ново судење кое треба да заврши до крајот на јуни, а кое е особено интерес за УЕФА. Претходно УЕФА го казни Јувентус со 3,5 милиони евра за кршење на финансискиот фер-плеј, додека му „прости“ нови речиси 20 милиони евра казни и му даде нов рок да ја средат работата.